Oleh A. Malik Ibrahim
HAMADAN! Manyonya gubernur ini me bagabu bae-bae punya lagi. Anteru ruang karja deng ruma dinas me mace biking sandiri (swakelola). Sondor bafikir deng kontraktor yang ada di sei kantor.
Pilgub so abis. Tara pasang kira, tapi garap. Dapa inga oras itu maitua pidato pelantikan deng carita konga bilang,“Memastikan tiap lembar rupiah dalam APBD adalah doi rakyat, maka harus kase bale ulang di rakyat, for dorang pe hidop deng ana-ana pe masa depan.
Orang-orang bataria, “Hiduup Ibu Gub. Cocoook!” Ibu Gub pe pidato gaco. Sapu rata. Ko Mid tatawa sampe tatigo deng bilang, “Kita eleng. Kita eleng dia, dia eleng kita. Tong baku eleng sampe skeleng.”
Pokoknya Maluku Utara ini harus torang biking kase maju. Jang rupa sama deng pemimpin dulu pe kalakuang. Biasa cuma warmus deng reno doi rakyat. Trus ada tamang manyao bilang, “Iyo barang fajaru tarada! Elaaa, sapa la tara tarukira pa ngoni. Hari ini bolong. Ngana pe karja cuma kalao-kadara deng batiktok saja kong”.
***
Kalamaring kita pe birman riwayat kalo Ibu Sherly itu dari dulu popoji so tabal. Bos dang. Jadi so tara mangkage deng doi. Dong bilang maitua so klar deng diri sandiri. Artinya, so tara basisaka dengan sembako, barito deng minya tana. Apalagi cuma bakasang kamasi. Maitua so kanyang, tara pikirang lagi deng mahode.
“Ce laa, biking diri. Ngana sama deng tusa, bagará ka pujian H.Padahal, oh ternyata cuma slak, magohu deng slaken saja. Laeng di bibir, laeng di niat.”
Cei, farek deng ngoni yang pasang muka bangka. Kita pe niat memang ukur tobat. Jang kore-kore lagi. Ampablas miliar. Itu kita pe rumah biaya tangga. Tarima fol-fol untuk bali smengkeng deng bada viva. Kalo bali roti coe, akang ponong satu lapangan. Pia pai itu for Opo pe mami Sherly.
Jang snewen deng taru kira, paitua Wagub punya me ambor alus lagi. Dalapang miliar. Lumayan bisa bali tana, kobong deng basimpang for pansiong. Masyarakat so kase sanang ngoni deng bayar pajak, baru stel bikin muka maskena. Rasa-rasa sadiki ka. Pribahasa bilang, satu kali fals, so susa mo parcaya.
Skarang kira-kira jo. Torang me bingung dengar ngoni mo biking proyek jalan. Kalo tar salah dia pe nama “Trans Kieraha” ka apa itu?. Tong dengar macang bingung. Jalan rongo supaya jang baron jao la takser baku tahate deng ujung Sofifi—Ekor—Subaim—Kobe.Pake Aba Id pe istila beleid, “Mempercepat konektivitas dan mendorong pertumbuhan ekonomi kawasan.”
Ngoni tau! Kalo sampe jalang itu tambus, yang paleng simore itu perusahaan tambang. Pas maso di kordinat jalur konsesi deng smelter, Iwip akang smangat pelor. Kalu bole gas kiapa kong paláng. Ada harus ngoni garis peta deng tatawa, padahal de pe mangale dekat ngoni pe lahan tambang, PT. Karya Wijaya.
Kalaha kalo mau biking jalan itu ngoni survei detail dulu ka! Ini tarada, babadiam ser orang bisi deng ngoni tarek meter. Pantas, tara ada dia pe presisi, pemetaan cuma iko puru pe mau, rai-rai manggustang. Masyarakat ini so pastiu deng pamarenta pe gaya. Bagara tarek meter deng pasang patok. Kunci rekeng kabawa ngoni kase dekat deng ngoni pe lahan konsesi tambang. Brenti deng karja tumburafo bagitu. Hafal saja!
Itu pasti ngoni so baku ator deng bos perusahaan tambang. Supaya kase lewat di dong pe area, termasuk ngoni punya. Ruas jalan tara lewat blakang kampong deng penduduk pe kobong. Asli, pantas la 11 warga adat Maba Sangaji dapa tahan ngoni konto frek dorang. Balingkar kasana kamari kase rurang, ternyata ngoni so biking jojobo deng gurita oligarki itu. Talalu banya hasi deng eksen!
***
Maruwahe sampe! DPRD di huk kantor koro pa ngoni itu kalaha datang ka. Tunggu baku tunggu, sampe dong bataria lida ana kaluar me ngoni goib. Tau-tau so batiktok di tanarata (Jakarta). Jang bikin diri pongo, talinga itu pake sadiki. Bagaimana RAPBD 2026 bisa klar kalo ngoni deng DPRD cuma bakulur.
Dlapang anam, kalo so talalu kanyang sampe so tara war-war bicara. Torang pe orang tua-tua bilang itu foso,boboso. Kalo hidop talebe-lebe tako tara abis-abis. Artinya, orang itu makin kaya, biasanya makin sagadoba. Sama deng talang onde-onde panas bulat-bulat.
Kalo cuma makang popeda sagu tumang, kua soru deng ikang tore tara mungkin 39 juta rupia abis satu hari. Akang rayat bilang, cukardeleng urus puru satu kapala daerah saja ceke APBD satu bulan 1,17 miliar. Kong bagaimana deng rayat Maluku Utara, yang de pe banya 1,3 juta jiwa pe nasib? Bae-bae jang sampe tatigo!
Dong bilang itu wajar. Standar, ukuran MBG (Makan Basuar Golojo). Wagub punya me gumala goros lagi, dalapang koma lima miliar. Tara pusing deng tanggal tua. Asal ngoni sejahtera, karna fanai masone ini setara deng 711,5 juta satu bulan, 23,7 juta for satu hari. Sanang kiamat e! Jang sampe so rugi baru baku rekeng. Sekda punya dong bilang tipis me boleh lagi. Dalapang dua ampa juta rupia satu taon.
Di provinsi itu dong kaya-kaya. Gubernur deng Wagub saja tara mau oto bakas. Mau yang cabu dos. Masih alen. Ajaib, pemimpin baru tabeat lama. Rayat bayar pajak sampe maraya for tanggung ngoni dua pe kemewahan diri.
Iyo, asal hati-hati jang makang tikungan kong maso jurang. Gubernur saja dari sio pengpeng, pengusaha jadi penguasa. Merangkap dibo-dibo tambang. Sapa tau ada yang mau iko jojobo proyek untuk jalan trans kieraha.
Jadi kunci rekeng ka bawa samua ini walhasil. Biar ngoni mo bicara sampe gidi-gidi malele deng muka tabembeng orang tara parcaya.
Kona ya, skarang tong cek sound RAPBD 2026. Lia di anggaran bali baju dinas, batik deng kos olahraga basar kiamat: 552 juta 750.000 ribu. Tiap bulan pake 46 juta for bali baju baru. Doi itu dari pajak motor tukang ojek, tiap taon tukang ojek bayar 984.000. Jadi 650 tukang ojek babari tanggung Gubernur dan Wagub pe pakeang satu lamari.
Ngoni manyala, rayat singsara. Itu yang Mantri Keuangan Purbaya sosere bilang “imoralitas fiskal.”Tabeat ator doi daerah yang menyimpang dari prinsip etika deng moralitas publik. Rayat banting tulang bayar pajak, ngoni pe kemewahan rias diri deng bachacha.
Capat la ngoni farmak APBD yang tara masok akal itu. Jang bahagia di atas penderitaan rayat. Ampong…! Lia kabawa ngoni kongaborasi kase tabubale angka deng kali-kali binongko: sama dengan kita ngana, kita ngana.[]
Komentar